Cyngor Caerffili wedi ymuno â’r Siarter Creu Lleoedd

Mae Cyngor Bwrdeistref Sirol Caerffili wedi rhoi ei ymrwymiad i sicrhau bod egwyddorion creu lleoedd wrth galon ei raglen ddatblygu.

Mae’r Cyngor wedi ymuno â Siarter Creu Lleoedd Cymru, sy’n nodi egwyddorion ar gyfer datblygu lleoedd o ansawdd uchel er budd cymunedau.  Wrth ymuno â’r Siarter, mae’r Cyngor wedi cytuno i fabwysiadu chwe egwyddor creu lleoedd wrth gynllunio, dylunio a rheoli lleoedd newydd a phresennol.

Mae’r egwyddorion sy’n cael eu hamlinellu yn y Siarter, sydd wedi’i datblygu gan Lywodraeth Cymru a Chomisiwn Dylunio Cymru yn cynnwys:

• Cynnwys pobl a chymunedau wrth ddatblygu cynigion.
• Dewis lleoliadau cynaliadwy ar gyfer datblygiadau newydd.
• Blaenoriaethu teithio llesol a thrafnidiaeth gyhoeddus.
• Hyrwyddo defnydd cymysg.
• Creu strydoedd a mannau cyhoeddus sy’n gynhwysol, wedi’u diffinio’n dda, yn ddiogel ac yn groesawgar.
• Parchu rhinweddau cadarnhaol ac unigryw lleoedd presennol.

Meddai’r Cynghorydd Sean Morgan, Arweinydd Cyngor Caerffili, “Mae’r ethos creu lleoedd wrth galon y Cyngor.  Gan lofnodi’r Siarter, rydyn ni’n dangos ein hymrwymiad cadarn i fabwysiadu agwedd gyfannol at ein holl ddatblygiadau.”